Aminado ang officer-in-charge sang Provincial Environment and Natural Resources sang Negros Occidental nga may kabudlayan ang pagpalong sang kalayo sa nagluntad nga forest fire sa Mt Kanlaon sa bahin sang Barangay Bi-ak na Bato, banwa sang La Castellana, Negros Occidentals bangud wala sang maagyan ang fire truck.
Ang sunog ang nagluntad ala 1:41 ang takna kahapon sang hapon.
Sa interview sang Bombo Radyo Bacolod kay Engineer Joan Nathaniel Gerangaya, nagdangat sa 35 hectares ang grass land nga nasunog kahapon.
Suno kay Gerangaya, kaina sang aga, paagi sa supervision sang provincial government sang Negros Occidental, gindeploy ang Quick React Team sang Disaster Risk Reduction Management Office, Mt. Canlaon Rangers, Canlaon Green Brigade kag Bureau of Fire Protection samtang ang Local Government Unit sang La Castellana sa pagpanguna ni Mayor Rhummyla G. Nicor-Mangilimutan nga naghatag man sang pagkaon kag kinahanglanon sang nagresponde sa forest fire.
Suno kay Gerangaya, bangud wala sang maagyan ang fire truck, ang gin-ubra nalang sang mga volunteers kag fire personnel ang nagbutang sang fire line agud nga indi na magtabok ang kalayo kag nagagamit sang pamaspas kag backpack nga may unod nga tubig agud mapalong ang kalayo.
Ginatinguhaan nga indi na maglapad ang grass fire agud indi malab-ot ang mga kakahuyan kag ang mga pamalay malapit sa lugar.
Wala man sang reported nga nasamaran sa nagluntad nga forest fire.
