Ginpatpat sang officer-in-charge sang Provincial Environment and Natural Resources sang Negros Occidental nga duha ka sahi sang protected areas sa Pilipinas.
Sa interview sang Bombo Radyo Bacolod kay Engineer Joan Nathaniel Gerangaya, natunga sa duha ang protected areas sa Pilipinas kag ini ang ginalakipan sang multiple use zone kag strict protection zone.
Suno kay Gerangaya, ang strict protected zone ang ginapahanugutan lamang nga makasulod ang mga natives ukon mga indigenous people kag wala na sang iban nga mahimo makasulod didto.
Ang multiple use zone naman ang may yara sang ginapahanugutan nga aktibidad kaangay sang camp site, eco tourism, agro-forestry, paglabay sang transmission lines kag mga existing road networks.
Suno kay Gerangaya, ang Local Government Units sa probinsya sang Negros Occidental kaangay sang Silay, Talisay kag EB Magalona padulong sa San Carlos City ang may yara sang multiple use zone gani may yara sang mga structures nga makita sa bahin sang mga kabukiran kaangay sang kapehan.
Samtang, sa kaso naman sa Bohol sang gindeklarar ang lugar nga protected area bangud sa Chocolate Hills nalakip naman ang titulado nga duta.
Apisar nga titulado ang duta nga nahamtangan sang Captains Peak Resort, may mga restrictions naman ang pagdevelop sini bangud nalakip ini sa heritage site.
Suno kay Gerangaya dapat may Environmental Compliance Certificate antes ang building kag business permit apang bisan siya indi makasabat kun paano natigayon ang pagtukod sang nasambit nga resort sa protected area.
Suno diri, indi na lipod nga magtinudluanay na ang mga opisyales sa kun paano naaprubahan ang permits sang resort sa Bohol, apang suno kay Gerangaya, ang sigurado nga mapierde ang environment samtang nagapadayon ang negosyo nga wala ginasunod ang legal procedure.
