Nag-abiso ang officer in charge sang Silay Public Cemetery sa mga residente nga magbisita sang timprano sa ila mga minatay sa tion nga siraduhan man ang mga patyo sa tigkalalag bangud sa COVID-19.
Nahibaluan nga igarekomendar ni National Policy Against COVID-19 chief implementer Carlito Galvez nga tun-an ang pagsirado sang tanan nga mga patyo sa tigkalalag agud nga mapunggan ang paglapta sang coronavirus.
Sa interview sang Bombo Radyo kay Marvin Bastida, naintindihan sini ang rekomendasyon ni Galvez bangud maayo man ang tinutuyo sini nga malikawan ang paglapta sang virus apang may mga pamilya gid nga luyag kuntani magselebrar sang tigkalalag kag magsindi sa ila mga minatay.
Suno diri, ang sitwasyon ang tigkalalag sa ciudad kag probinsya ang magadepende sa mga opisyales gani samtang wala pa nakapagwa sang pagsulundan nahanungod diri, nag-abiso si Bastida nga magpadulong na lang sa patyo antes ang Nobyembre 1 agud makasindi sang timprano.
Gindugang man sini nga sarang man nga makasindi ukon makaobserbar sa ila tagsa-tagsa ka mga panimalay.
Suno sa iya, ila man tinguhaan nga matinluan ang patyo sa mas madasig nga tinion agud amat-amat naman nga makakadto didto ang mga tawo.
Nagpasalig man ini nga ila ginpahanumduman ang mga nagabisita nga mag-obserbar sang social distancing sa patyo, likawan ang pagtililipon kag indi na magtinir didto sang malawig.
