Nag-abot na sang Miyerkules sa probinsya sang Negros Occidental kag syudad sang Bacolod ang mga official ballots para sa May 9, 2022 National and Local Elections.
Suno kay Negros Occidental Provincial Election Supervisor Atty. Roberto Salazar, gina-amat amat na tsekyar kag imbentaryo ang mga balota kag ini ang umpisa naman nga igapanagtag sa mga syudad kag banwa subong nga semana.
Ang mga vote counting machines (VCM) ang nauna na nga napadala sa mga banwa kag syudad sa probinsya sang Negros Occidental.
Ang mga ini ang iga-endorso sa mga City ukon Municipal Treasurer nga amo ang incharge sa mga election paraphernalia kaangay sang mga VCM, Ballot Boxes, mga official ballots kag iban pa.
Ang pagtransport ang iga-escort sang mga katapo sang Philippine National Police (PNP) kag Armed Forces of the Philippines (AFP) padulong sa mga banwa kag syudad.
Ang mga city ukon municipal treasurer ang magahupot sang mga election-related materials tubtob sa ang mga ini ang kuhaon sang mga manunudlo nga magaserbe sa eleksyon sa Mayo 9 sang kaagahon.
Nagpasalig naman ang election supervisor nga indi mabuksan ang mga official ballots bangod ini ang silyado kag ini ang mabuksan lang sa mismo nga adlaw sang eleksyon.
Samtang ang VCM naman ang ipaidalum sa final testing and sealing sa Mayo 7.
Suno kay Salazar, yara sa masobra 1.9 million ang registered voters sa Negros Occidental samtang may-ara naman sang 296 ka mga gintalana nga clustered precinct.
Ang Negros Occidental amo na ang ikaduha sa may pinakamadamo nga botante sa Western Visayas.
