Wala sang plano nga magpauli ang overseas Filipino worker sa Israel apisar sa mga missile attacks sang Iran.
Madumduman nga nagpadala sang ginatos nga missile ang Iran bilang balos sa nangin pag-atake sang Israel nga gintawag nila nga “declaration of war.”
Sa interview sang Bombo Radyo Bacolod kay Elvie Aviador Pregua, Bombo International News Correspondent derekta sa Israel, sa siyam ka tuig sini nga pagtrabaho sa pungsod naanad na ini sa mga pagsigabong.
Pasalig sini nga maayo ang ila kahimtangan, basta nagasunod lamang sa mando sang gobyerno.
Pahayag sini nga kalabanan sa mga balay kag establishimento ang may bomb shelter, magluwas lamang sa mga tuman na ka daan ang balay nga nahuman sa tion nga indi pa uso ang missile attacks.
Kampante man sila sa ikasarang sang iron dome nga naga-intercept sa mga missile gani ini ang nagalupok sa kahawaan.
Apang gina-abiso gihapon sang gobyerno ang pagpanago sa mga bomb shelter bangod apisar ma intercept kag mapalupok sang iron dome ang mga missiles, ang mga debris nga nagakadagdag amo ang nagatuga sang kahalitan.
May ginpadownload man sa ila mobile phone nga apps nga magahatag sang warning lima ka minutos antes makalab-ot sa Israel ang missile sang iban nga pungsod.
Gani sila ang may nagakaigo pa nga panahon sa pagpadulong sa bomb shelter.
Wala man sang problema sa supply, bangod kalabanan sang mga taga israel ang may kabinet nga puno sang pagkaon kag puno man masami ang mga refrigerator.
Aminado man si Pregua nga tuman ka init sa sulod sang bomb shelter bangod ini ang human sa salsalon, gani makadali lamang ang pagtinir diri kun wala sang aircon ukon electric fan.
Dugang pa sini nga wala sang signal sa sulod sang iron dome.
Pahayag sini nga sa karun, siya kag ang iya alaga nga mal-am ang nagahulat lamang sang mga abiso kag gilayon nga nagasunod sa mga derektiba sang Israeli Defense Forces.
Pasalig sini nga safe sila sa Israel kag indi pa sini luyag nga magpauli sa Pilipinas bangod apisar nga wala sang gyera, sila ang mapatay naman sa gutom bangod wala sang trabaho.
