Nakapauli na kagab-i ang overseas Filipino worker nga iloy sang tatlo ka kabataan nga ginlampusan sang bato sa Hacienda Badiang, Brgy E. Lopez, Silay City, kun sa diin isa ang napatay.
Sa interview sang Bombo Radyo Bacolod kay Barangay Kagawad Ramy Beladres sang Brgy E. Lopez, Silay City, ang iloy ang ginsugat sa airport sang mga personnel sang Overseas Welfare Workers Administration (OWWA) kapin alas-7:00 tubtob alas-8:00 sang gab-i.
Samtang nagpadala naman sang ambulansya si Silay City Mayor Joedith Gallego, bangod sa kabalaka nga mahimo maglain ang pamatyag sang iloy.
Sila ang naghapit sa Corazon Locsin Montelibano Memorial Regional Hospital, kun sa diin nahamtang ang mga biktima antes nagpauli sa Hacienda Badiang, Brgy E. Lopez, Silay City.
Madumduman nga naabtan na lamang sang amay nga nagatrabaho sa Bacolod City ang makaluluoy nga kahimtangan sang tatlo ka kabataan nga edad 15 anyos nga babayi, siyam ka tuig nga babayi kag apat ka tuig nga lalaki.
Napatay ang 9 ka tuig matapos ginalantaw ginlampusan sang bato sa ulo kag likod, samtang padayun pa nga ginabulong sa ospital ang 14 anyos nga nabuka ang sag-ang kag apat ka tuig nga ginlukat ang isa ka mata.
Suno kay Belandres, wala pa sila sang nadakpan nga suspect.
Sila sa Barangay ang nagapangita man sang ebidensya nga makabulig sa imbestigasyon.
