Aminado ang Silaynon nga yara sa Bangkok, Thailand nga halos tanan ang nakugmat sa pagtay-og sang 7.7 magnitude nga linog sa Malaysia, apang naglab-ot kag nakatuga sang madamo nga nagkalamatay.
Sa interview sang Bombo Radyo Bacolod kay Bombo International News Correspondent Fely Laus, kaangay nga ang Bangkok lamang ang naapektuhan sa Thailand bangod wala man ini nabatyagan sa iban nga lugar.
Sa 13 ka tuig sini nga pagtrabaho sa pungsod, karun lamang nakabatyag sang linog sa lugar si Laus.
Bangod wala man nagalinog sa pungsod, gani indi man earthquake resilient ang mga building rasun nga may-ara sang nagkalarumpag.
Kalakip na ang building nga may ginaconstruct pa nga bahin nga nag-usmod kag tubtob sa karun padayun pa ang recovery operations sa mga natampukan nga biktima.
Ginapakamaayo na lamang ni Laus nga duha ka panalgan lamang ang balay nga iya ginatrabahuan kag ang iya kwarto ang yara sa ground floor.
Aminado ini nga sa umpisa, nagpinsar pa siya nga nagalingin lamang ang iya ulo kag sang namutikan nga may-ara sang linog, gilayon man sila nga naggwa sang iya amo.
Makita naman ang panic sa mata sang mga pumuluyo bangod sila ang wala naanad sa linog.
Nakibtan man ang iya alaga nga naga-eskwela sa International School bangod sa nagtinikluranay na ang mga kabataan bunga sang panic.
Suno diri, bangod sarado na ang klase sang public schools, ang mga international schools na lamang ang naapektuhan sang linog.
Samtang nagdangat naman sa anom tubtob walo ka oras ang pagbug-at sang traffic.
Bisan ang amo sini nga piloto sang eroplano ang wala man nakaabot sa iya scheduled flight matapos maipit sa traffic.
Samtang pila sa mga taytay ang ginsirad-an man bangod sa kahangawa nga may-ara sang crack tuga sang linog kag ini ang magcollapse.
Ginapasalamat na lamang ni Laus nga sila ang wala matam-an.
Suno diri, nagacontact man sila nga mga overseas Filipino workers kag wala man sang nareport nga nasamaran ukon napatay.
Samtang ang embahada sang Pilipinas ang nagareach-out man sa ila kahimtangan.
Pasalig ni Laus sa iya mga himata partikular na sa Brgy Guimbalaon, Silay City nga sila ang safe kag wala sang dapat nga kahangaw-an.
