Apisar nga may yara sang certificate nga nagapamatuod nga nakatapos na sang self-quarantine ang mga Overseas Filipino Workers nga irepatriate sa probinsya nagikan sa Cebu, kinahanglan gihapon sang mga ini nga magpaidalom sa 14 day isolation pag-abot sa Negros Occidental.
Sa interview sang Bombo Radyo kay Dr. Zeaphard Gerhart Caelian, pinuno sang Provincial Disaster Management Program Division, ginpahayag sini nga subong nga adlaw ginalauman nga maga-abot ang 35 ka mga OFWs nga nastranded sa Cebu bangud naabutan ang mga ini sang enhanced community quarantine (ECQ).
Suno sa iya, sa 35, 15 diri ang taga-ciudad sang Bacolod kag 20 ang nagikan sa mga local government units.
Suno kay Caelian, RORO vessel ang pagasakyan sang mga ini kag idiretso sila sa EB Magalona para sa quarantine.
Gilayon nga magapatigayon sang rapid test ang Provincial Health Office kag kun may yara sang reactive, suno sa iya, gilayon ini nga kuhaan sang swab.
Gindugang man sini nga mando ni Governor Eugenio Jose “Bong” Lacson ang pagquarantine sa mga ini bangud indi sini luyag nga masudlan liwat sang kaso ang probinsya ilabi na nga gaamat-amat na tahaw ang virus.
Nagahanda naman ang probinsya sa masobra 20 ka mga OFWs nga sunod nga irepatriate matapos makapauli ang una nga batch.
