Personal nga ginalantaw sang officer-in-charge sang Bacolod Police Station 2 nga sa sulod sang salakyan ni Atty. Danny Pondevilla ang nagtiro sa iya sang Martes sang gab-i.
Sa interview sang Bombo Radyo kay Police Lt. Jonito Pastrana, ini ang iya personal nga analysis santo sa ejection sang bala sa sulod sang salakyan ni Pondevilla nga Honda CRV.
Suno kay Pastrana, wala sang buho sang bala sa salakyan kag sa sulod nakita ang empty shell.
Sa karon, ginahulat pa nga maggwa ang resulta sang paraffin test nga ginpatigayon.
Igasumiter man ang cellphone ni Pondevilla sa Anti-CyberCrime Division sang Police Regional Office 6 agud malantaw kun sarang pa maretrieve ang deleted messages.
Suno sa mga himata ni Pondevilla, madugay na ini nakabaton sang pamahog kun sa diin nakabaton ini sang mensahe nga may bagul apang deleted na ang mensahe.
Antes ginturn-over sa utod nga babayi ni Pondevilla ang cellphone, ginauyatan ini sang person of interest nga executive secretary man mismo sang biktima bangud gindala niya ini matapos ang krimen.
Suno kay Pastrana, ginkuha sang executive secretary ang cellphone sang biktima matapos ang insidente apang iya ini nga ginhatag sa utod ni Pondevilla kun sa diin nag-ako man ini nga iya gindelete ang messages.
Naghipos naman ang himata ni Pondevilla sang ginpahayag sang executive secretary nga iya gindelete ang messages.
Suno kay Pastrana, igapaidalom sa digital examination ang cellphone bangud mahimo nga maretrieve pa ang deleted messages.
Nakakuha ang Bacolod Police Station 2 sang CCTV footage sang isa ka commercial establishment kag nagatinguha pa ang mga ini nga makakuha sang dugang nga footages.
May kabudlayan man ang mga ini sa pagkuha sang footage sa ginluntaran sang insidente bangud wala sang CCTV camera sa magtimbang nga bahin sang dalan sa diin natabo ang krimen.
