Opisyal na nga nagpungko bilang officer-in-charge sang Negros Occidental Police Provincial Office si Police Col. Romy Palgue kahapon matapos ang ginpatigayon nga turn over of command seremony sa NOPPO headquarters.
Nahibaluan nga magaretiro na si P/Col. Romeo Baleros bangod magadangat na ini sa retirement age nga 56 sa Hunyo 6.
Nagtambong sa amo nga seremonya sanday Negros Occidental Governor Eugenio Jose “Bong” Lacson, Silay City Mark Golez, iban pa nga opisyal sang probinsya, Police Regional Office 6 director Brig. Gen. Rene Pamuspusan, 303rd Infantry Brigade commander Inocencio Pasaporte, Bacolod City Police Office director Col. Henry Biñas kag tanan nga hepe sang kapulisan sa probinsya.
Sa nangin pahayag ni NOPPO officer-in-charge Col. Palgue, ginpasalamatan sini ang gobernador nga nagpili sa iya paagi sa pagpadala sang request letter agud siya ang magabulos sa pwesto ni Baleros.
Suno diri, iya lamang padayunon ang hinimuan sang anay provincial director agud mapabilin ang peace and order sa probinsya.
Nagapati naman ini nga “very supportive” gid ang mga local chief executives sa kapulisan gani himuon sini ang aton agud nga magserbisyo sa mga Negrense.
Samtang, ginpasalamatan naman ni Pamuspusan ang nangin serbisyo ni Baleros sa Negros Occidental sa sulod sang isa ka tuig kag anom ka bulan.
Suno kay Pamuspusan, napun-an gid ni Baleros ang iya mga obligasyon agud mapatuman sang husto ang mga programa sang PNP subong man ang pagpabilin sang katawhayan sa probinsya.
Ginpahayag man ni Pamuspusan nga may yara siya sang full trust kay Palgue nga pamunuan ang Negros Occidental sang husto.
Nahibaluan nga si Palgue amo man ang Director sa Human Resource and Doctrine Development sa PNP National Headquarters sa Camp Crame.
Ini ang anay Deputy Director man sa Butuan City Police Station kag naggraduate ini sa PNPA Batch 1997.
