Lauman nga may yara sang pagnubo sa presyo sang produktong petrolyo sa masunod nga semana matapos ang pito ka semana nga asod-asod ang oil price increase.
Suno kay Department of Energy Oil Industry Management Bureau Assistant Director Rodela Romero, santo sa apat ka adlaw nga trade monitoring sang Means of Platts Singapore, lauman ang sa P0.17 nga decrease sa kada litro sang Gasolina, P0.54 sa kada litro sang Diesel kag P0.47 sa kada litro sang Kerosene.
Apang gin-athag ni Romero nga ang presyo sang Diesel kag Kerosene sa local market mahimo magnubo ukon wala sang adjustment samtang ang Gasolina naman mahimo nga mag-increase.
Suno sa DOE official, ang rollback resulta sang oversupply sang oil products sa global market kasunod sa resumption sang exporting oil sang Iraq halin sa Kurdish region kasubong man sa pag-anunsyar sang Organization of the Petroleum Exporting Countries sang increase sa oil production sa 137,000 barrels per day sa Nobyembre.
Suno pa kay Romero, ginpasaka man sang Estados Unidos ang oil inventory sa tunga sang pagshutdown sang gobyerno matapos nga wala nakapasa sang funding resolution ang kongreso.
Samtang naapektohan man ang oil price bangod sa ceasefire sang Israel kag Hamas sa giyera sa Gaza.
