Liwat nga lauman nga may yara sang pagsaka sa presyo sang Diesel kag Kerosene sa masunod nga semana samtang posible naman nga wala sang pagbag-o sa presyo sang Gasolina.
Santo sa apat ka adlaw nga trade monitoring sang Means of Platts Singapore, suno kay Department of Energy Oil Industry Management Bureau Assistant Director Rodela Romero, lauman nga magasaka tubtob sa P0.30 ang presyo sa kada litro sang Diesel kag P0.35 naman sa kada litro sang Kerosene.
Mahimo naman magnubo sa P0.35 ang presyo sa kada litro sang Gasolina apang suno kay Romero ini indi man sa gihapon mabatyagan sa local market bangod sa operating costs kag premium costs sa mga oil companies nga kun kaisa nagadangat sa P0.30 tubtob P0.40.
Pa-athag ni Romero, ang price hike ang bangod sa padayon nga pagpang-atake sang Ukraine sa Russia kag pagdagdag sang sanction sang United States sa oil companies sa Russia.
Samtang ang rollback sa Diesel ang bangod naman sa ginalauman nga increase sa produksyon sang Organization of the Petroleum Exporting Countries and allies (OPEC+).
Samtang, ginpahanumdom man sini nga wala dapat sang pagbag-o sa presyo sang Kerosene kag LPG products sa mga areas nga ginpaidalum sa state of calamity bangod sa typhoon Tino.
Ini epektibo sa sulod sang 15 ka adlaw matapos ang deklarasyon sang state of calamity.
Madumduman nga sang Nobyembre 06, gin-aprubahan ni President Ferdinand Marcos Jr. ang deklarasyon sang state of national calamity bangod sa halit nga ginbilin sang bagyo Tino kag sa manug-abot nga super typhoon Uwan.
