Personal grudge ukon daan nga hiligut-anon ang isa sa mga motibo nga ginalantaw sang Bacolod Police Station 6 kun ngaa ginpatay ang anay police officer nga si Ryan Lumogdang sang Huwebes sang gab-i.
Madumduman nga si Lumogdang ang gintiro sang riding-in-tandem suspects sa atubang sang University of Negros Occidental-Recoletos kag ginbawian sang kabuhi sa Corazon Locsin Montelibano Memorial Regional Hospital.
Sa interview sang Bombo Radyo kay Police Major Leo Estopa, station commander sang Bacolod Police Station 6, naghingyo na sila sang kopya sang footage sang CCTV camera nga nakakabit sa mga establisyimento malapit sa crime scene kag nagalaom ang kapulisan nga makakuha sang testigo.
Nakig-angot naman ang imbestigador sa misis ni Lumogdang agud mausisa kun sin-o ang ulihi sini nga nakaupod.
Ginbisitahan man ang previous assignments sang anay pulis kaangay sang City Drug Enforcement Unit sang BCPO.
Ginkadtuan man sang imbestigador ang fitness gym kun sa diin nagatrabaho si Lumogdang antes ini gintiro bangud nagaserbe ini bilang fitness instructor.
Suno sa kaupod sini sa gym, nagpaidalom si Lumogdang sa drug rehabilitation sang tuig 2020.
Marso 2 naman ang ulihi sini nga pagpadulong sa fitness gym.
Madumduman nga nagpositibo si Lumogdang sa drug test sang tuig 2015 gani nagpangatubang ini sang kaso administratibo.
Sa karon, indi pa maestablish sang Police Station 6 kun pila ang kabug-usan nga kaso nga ginapangatubang ni Lumogdang apang ila ginpasalig sa pamilya sang biktima nga ginatinguhaan nga mahatagan sang hustisya ang kamatayon sini.
