Nagapangamuyo karun ang Yanson matriarch nga magpamati ang tatlo pa niya ka mga kabataan sa pagpanawagan sang iya kamagulangan nga bata nga magpalapit na sa iya sa tunga-tunga sang away nila nga magpamilya.
Ini ang tikang ni Olivia Villaflores Yanson kasunod sang pagpakigkita na sa iya ni Roy sang Domingo kasunod sang tanyag sini nga reconciliation sa tunga sang inagaway nila sang posisyon sa Vallacar Transit Incorporated.
Apang ginpahayag ni Roy sa press conference kahapon nga indi nila pag-ibalik ang shares sa kompaniya sang ila iloy santo sa hingyo sini bangud sang kahangawa nga ihatag niya ini kay Leo Rey nga amo presidente kag chief executive officer sang Vallacar Transit Incorporated kag utod man sini nga si Ginnete.
Bilang sabat naman sa nangin pahayag ni Roy, nagpanawagan si Olivia nga respetuhon siya bilang iloy kag co-founder sang kompaniya.
Kadungan sini ang panawagan sa mga kaupod ni Roy sa Fantastic 4 nga sanday Ma. Celina Yanson-Lopez, Emily kag Ricardo Jr. nga kalimtan na ang akig, inggit kag kasakon kag magpalapit sa iya.
Suno sa matriarch wala na sang mabilin sa masunod nga henerasyon sang mga Yanson kun padayon ang pag-ilinaway sang mga iya mga kabatan sa karun.
Nagapamangkot man ini kun tuman gid kabug-at ang iya hingyo sa iya mga kabataan nga sa nagahinunod niya nga kabuhi, makita sila nga maayo ang pagtamdanay kag wala naga-inaway.
Nahibaluan nga naga-edad na karun sang 85 si OVY kag aminado ini nga diutay na lang nga tinuig ang iya itiner sa kalibutan.
Bukas sa reconciliation ang iban pa nga miembro sang Fantastic 4 sang Yanson siblings basta nga maplastar sang husto ang mga hinambalan.
Sa pag-atubang ni Ricardo Yanson Jr. nga upod ni Roy, Ma. Celina Yanson-Lopez kag Emily sa Fantastic 4, ginpahayag sini nga antes pa man nakigkita ang ila kamagulangan sa ila iloy nga si Olivia sang Domingo, may yara naman sila sang naistoryahan sa nakaligad nga bulan.
Wala man gindetalye ni Ricardo kun anu ang mga hinambalan, ginpahayag sini nga kun maplastar ang mga agenda, handa siya sa pagpakig-istorya sa ila iloy.
Bukas man si Ma. Celina sa reconciliation basta may yara sang sinseridad gikan sa kampo sang ila iloy nga si Olivia, Leo Rey nga amo karun ang presidente kag chief executive officer sang Vallacar Transit Incorporated kag sa utod pa nila nga si Ginnete Yanson-Dumancas.
Suno diri, mas maayo nga untatan na nila ang pagpasakaay sang kaso kag paghimo sang mga butang nga patalikod.
Samtang sa pamangkot kun san-o ang plano sini nga makigkita sa iya iloy, indi pa ini ang husto nga tion suno kay Ma. Celina kag panahon na lang ang makahambal.
