Nangin emosyunal ang Yanson matriarch matapos ang ginpatigayon nga special stockholders meeting sang Yanson Group of Bus Companies sa Brgy. Mansilingan, ciudad sang Bacolod kahapon.
Antes nag-atubang sa media para sa announcement sang bag-o nga set sang officers sang kompaniya kun sa diin napilian siya nga corporate secretary, nagpatigayon si Olivia Villaflores Yanson sang opening speech.
Diri iya gindumdom ang ila inagyan sang iya bana kag ang pagpadako nila sang ila mga kabataan nga sanday Roy, Ma. Celina, Emily, Jeanette, Ricardo Jr. kag Leo Rey antes nagsanyog ang ila negosyo.
Suno sa iloy, madumduman pa sini ang kabudlayan nila sang una nga mag-asawa nga halos sila makabakal sang gatas kag pagkaon sang ila kabataan apang karun nga sila na ang tag-iya sang pinakadako nga bus company sa Pilipinas, nagamo na sila.
Emosyunal si Olivia nga naga-apelar sa pihak nga kampo nga ginalakipan sang ginatawag Fantastic 4 nga sanday Roy, Ma. Celina, Emily kag Ricardo Jr. nga kun nakasala sila diri, kag sila amo man, kuntani madulugan na ini tanan kag magpinatawaray na lang agud mabalik na ang ila pagsinalayo sang una.
Samtang nagahibi naman si LRY nga nagahingyo sa iya mga magulang nga kuntani pabay-an na lang nila ang ila iloy nga malipay bangud tigulang na ini kag tapuson na nila ang away nila nga magpamilya.
Aminado ini nga sila man lang gihapon nga magpamilya ang makasulbar sang ila away.
Nagalaom naman si Jeanette nga mangin panugod na ini tanan sang healing process para sa ila nga magpamilya.
