Ginpasumiter ni Negros Occidental Governor Eugenio Jose “Bong” Lacson sang position paper ang tagsa ka mga alkalde tuhoy sa ila assessment sa One Hospital Command.
Sa interview sang Bombo Radyo Bacolod kay Cadiz City Mayor Salvador “Bading” Escalante, mahimo nga gina-ulan naman sang reklamo ang opisina sang gobernador gani siya ang nagpangayo na sang honest assessment.
Para kay Escalante, “disgrasya” ang natuga sang One Hospital Command kag madamo sang mga nagakapatay nga indi makasulod sa ospital.
Paathag sini nga sa Health Program sang Cadiz City, sila ang nagtukod sang St. Anne Medical Center kag may-ara man sang lying in.
Apang bangod sa One Hospital Command, imbes nga ideretso ang mga pasyente kaangay sang mga biktima sang aksidente, sila ang ginapahulat lamang sa gwa sakay sa ila service vehicle ukon sa ambulansya tubtob nga maclear na kag mapasulod.
Bangod sa kaluoy, ginpagamit sang alkalde ang lying in, agud mahatagan sang first aid ang mga emergency cases.
Pahayag sang alkalde nga may-ara sang hitabo nga may pasyente nga biktima sa aksidente nga yara na kuntani sa ospital apang wala ginbatun bangod kinahanglan nga magpaidalom sa One Hospital Command, gani ini ang ginbawian sang kabuhi.
Nagapati si Escalante nga may ponto man ang programa, apang dapat ini ang maplastar sang maayo.
Suno kay Mayor Bading, siya ang nag-utang sang P270 million para sa pagtukod sang DOH standard nga ospital, ginabanta yara man sa P250 million ang magastos sa staffing kag may-ara pa sang mga bulong, gani ginalantaw sini nga malapit sa tunga sa milyon ang iya kinahanglanon.
Ginalauman nga sa tunga-tunga sang 2026, matapos na ang construction.
