Ginpahayag sang pinuno sang Regional Drug Enforcement Unit-Western Visayas nga agud nga maconsummate ang drug buybust operation sa ila nga target sa ciudad sang Bacolod kahapon, nagdown ang mga ini sang bayad paagi sa online payment application samtang ang iban nga payment ang ginbank transfer sa suspek nga nakuhaan sang P2.7 million nga balor sang illegal nga druga.
Suno kay Police Major Rommel Anicete, nagpasugot man ang subject person sa nasambit nga transaction.
Ang ginakabig nga regional top priority level suspect nga amo si Jojo Segovia alyas “Boy Tattoo”, 21-anyos, wala sang trabaho kag residente sang Purok Lampirong, Barangay 2, Bacolod City kag nadakpan man si Lijun Tayona, 35-anyos, residente sang Block 8, Lot 32, Barangay Pahanocoy, Bacolod City, isa ka street level individual.
Suno kay Anicete, nakuha sa ila paghinakop ang lima ka heat sealed transparent plastic sachets sang suspected shabu nga gingamit bilang buybust items; 37 ka mga heat sealed transparent plastic sachets sang suspected shabu; ginkumos nga brown paper pouch; tatlo ka transparent wrapper; isa ka transparent plastic pouch nga naga-unod sang nagkalain-lain nga drug paraphernalia; isa ka black ecobag; isa ka unit sang android cellphone; isa ka scooter nga gray; kag iban pa nga non-drug items.
Ang nakumpiskar nga illegal nga druga ang ginabanta nagabug-at sang 400 grams kag nagabalor P2,720,000.
Suno diri, subong lamang nila nga bulan namonitor ang aktibidad sang duha kag diri man nila nahibaluan nga ang bayad sang downpayment kasubong man ang payment sa transactions sang duha ang ginapaagi sa online payment.
Nahibaluan naman sang mga otoridad kun sa diin nagakuha sang supply sang illegal nga druga sanday Segovia.
