Gin-anunsyar sang officer-in-charge sang City Health Office nga posible nga maimplementar na sini nga semana ang online nga pagproseso sang medical certificate for travel authority agud malikawan ang pagdinaguso sang mga nagapila sa CHO.
Sa interview sang Bombo Radyo kay Dr. Edwin Miraflor, ginpahayag sini nga wala naganubo sa 200 ka mga persona ang nagapila sa City Health Office kada adlaw agud magkuha sang medical certificate kag kun kaisa nagadangt pa ini sa 400.
Suno kay Miraflor, posible ini nga tunaan sang paglinatlanay sang COVID-19 gani agud madula ang ini nga kahangawa, ila iga-implementar ang pagtransaksyon online.
Suno sa iya, mas convenient ang online bangud apisar nga nagaproseso ang isa ka persona, sarang man ini gihapon nga makapadayon sang iya ginaubra.
Suno diri, may yara gihapon sang fill-upan nga health declaration form online kag kinahanglan gihapon nga magpadulong sa City Treasurer’s Office agud magbayad.
Ginpahayag man sini nga ila ginhimo ang ini nga procedure para sa kaluwasan sang tanan gani kuntani magtuon na nga mangin “techy” agud makaubra sang mga hilikuton paagi sa internet.
Gina-engganyo man ni Miraflor nga ang pumuluyo nga makigbahin sang survey tuhoy sa COVID vaccination kun sa diin 70% sang populasyon ang target nga mabakunahan sa ciudad sang Bacolod.
