Ginpaidalom sang Comelec sa testing ang ‘trusted build’ capability sang ipatuman nga una nga online voting and counting system para sa Mayo 12 nga piniliay.
Gintambungan ini sang mga katapo sang Comelec, Technical Evaluation Committee, kag election observers kaangay sang PPCRV.
Suno kay Comelec Chairman George Garcia, ini na ang katapusan mga test sa nasambit nga system nga imbulbado ang ila nga source code.
Ginapaabot nga mapagwa sang Comelec sang certification para sa Automated Election System pagkatapos sini.
Dugang pa ni Garcia, magapadulong sa pungsod ang international certifier sa masunod nga semana agud nga magsaksi sang sealing sang source code, nga natalana i-deposit sa Bangko Sentral ng Pilipinas.
Isubmit ang certification sa Technical Evaluation Committee, independent body nga ginabug-usan sang mga indibidwal gikan sa Comelec, DOST, kag DICT.
Ginpakita sang Comelec ang system ilabi na sa mga OFWs nga magapartisipar sa online voting.
Ginpaathag ni Garcia, indi pa automatic nga makaboto ang 1.3 million ka OFWs, kag kinahanglan nila nga mag enroll kag sila ang pagahatagan sang password.
Ang enrollment ang maga umpisa sa Marso 20 kag matakop sa Mayo 7.
Ang aktwal nga pagboto online ang maga umpisa Abril 13 tubtob Mayo 12.
