Ginkilala bilang “Hero of the Night” ang isa ka 11 anyos nga lalaki matapos nga ini ang nagaisahanon nga nagtabok gikan sa Ukraine padulong sa Slovakia.
Ang bata nga gikan sa Zaporizhzhia sa southeast Ukraine ang ginkilala nga “Hero of the Night” sang Slovakian authorities matapos nga ginapahayag nga siya ang nagtabok sa border sang Ukraine nga naga-isahanon tabok sa Slovakia.
Santo sa Slovak Ministry of Interior, ang 11 anyos ang nakasuksok sang backpack, isa ka plastic bag kag passport, kag may-ara sang telephone number nga nakasulat sa iya nga palad.
Pahayag sang ministry nga naga-isahanon lang ini nga naggwa sa pungsod bangod ang ginikanan sini ang kinahanglan nga magpabilin sa Ukraine.
Gilayon naman ini nga gin-amuma sang mga volunteers, gindala sa mainit nga lugar kag gilayon nga ginpakaon.
Sa statement sang ministry nga ginpost sa facebook sang Sabado, ginpasalamatan sang mga ini nga may impormasyon nga nakasulat sa kamot sang bata kag sa papel nga gin-ipit sa iya nga passport, gani nahimo sang mga staff sa border nga makig-angot sa himata sang bata sa Slovakia nga amo ang nagsugat diri.
Pahayag sang ministry nga nangin malapit ini gilayon sa halos tanan bangod sa iya nga yuhom, wala sang hadlok kag determinasyon nga nagakaigo lang sa isa ka matuod nga baganihan.
Sa karun, wala naman sang klaro nga rasun kun ngaa wala sang nakaupod ang bata.
Sa karun milyon-milyon na ang mga refugees nga nagbiya sa Ukraine kun sa diin 53.7 percent sa mga ini ang nagtabok sa Poland samtang ang iban naman ang nagtabok sa iban nga pungsod kalakip na sa Hungary, Slovakia, Moldova kag Romania.
