Nag-umpisa na sa pagpatigayon sang Onsite Vaccination ang Bacolod Emergency Operation Center (EOC) sa mga Business Process Outsourcing (BPO) Companies kahapon.
Suno kay Bacolod City Administrator Em Ang, Executive Director sa Emergency Operations Center (EOC), nagpadulong mismo ang mga vaccinators sa pila ka mga BPO Companies agud mabakunahan ang mga empleyado.
Kahapon, nakabakuna ang mga ini sa kabug-usan nga 1,602 nga mga BPO Employees nga ginalakipan sang 1,112 gikan sa Phanasiatic Solutions kag 490 gikan sa Teleperformance.
Paathag ni Ang nga ang mga BPO Employees ang kalabanan nagatrabaho kag nagapulaw sa gab-i kun sa diin nagatulog naman ang mga ini kun adlaw.
Ginpahayag man ni Ang nga indi man ang mga ini makapadulong sa vaccination center sa adlaw matapos ang trabaho bangod wala pa ang mga ini sang tulog.
Samtang masami naman nga gab-i na kun makabugtaw ang mga BPO employees kag indi gihapon makapabakuna bangod sarado na ang mga vaccination centers.
Suno sa City Administrator, sa ila nangin meeting, nakasugtan nga magapatigayon nalang ang syudad sang vaccination drive para sa mga graveyard shift nga mga empleyado.
Paathag ni Ang nga ini ang estratihiya nga napinsaran sang mga opisyales agud nga madala ang mga bakuna sa mga may luyag nga mabakunahan.
Samtang ginpakigbahin man ni Ang nga nahemo na nila nga makabakuna sang 12,000 ka mga Bacolodnon sa isa lang ka adlaw.
Aminado naman ang City Administrator nga mangin madasig ang innoculation drive kun may nagakaigo nga supply sang COVID-19 vaccines.
Ginpakigbahin naman sini nga 33 tanan ang mga vaccination center sang syudad apang sa masami pito lang sa mga ini ang ginabuksan bangod gamay lang ang supply nga sarang mabakuna.
Samtang ginalantaw man ni Ang nga mahemo na nga maroll out ang Moderna vaccine sa syudad kag prayoridad sa gihapon ang mga health care workers senior citizens kag may comorbidities.
Sa kabug-usan nagdangat na sa 179,000 ang mga nabakunahan na batok sa COVID-19.
