Nangin engrande, maduagon kag ginpuno sang fireworks ang opening ceremony sang 2022 FIFA World Cup sa Qatar.
Matapos ang opening speech ni Sheikh Tamim bin Hamad Al-Thani, ang Emir sang Qatar, ginpakita ang mga lights kag fireworks nga ginsundan naman sang pagpakita sang mga flags sang mga participating nations, mascots kag mga jerseys sang kada team.
Ginpangamuyo man ang Holy Quran nga ginpangunahan ni Ghanem Al-Muftah, nga isa ka 20-anyos nga Qatari nga ginbun-ag nga may yara sang Caudal Regression Syndrome (CDS) kun sa diin wala nakumpleto ang iya lower spine.
Mas nangin malipayon ang mga tumalambong sa Al Bayt Stadium sa Al Khor sang nagwa ang BTS member nga si Jung Kook.
Ginkanta sini ang official world cup song nga “Dreamers” kaupod si Qatari singer Fahad Al-Kubaisi.
Ginkuha man bilang narrator ang veteran actor nga si Morgan Freeman.
Nagwa sa nasambit nga seremonya ang mga mascots sang mga nagliligad nga FIFA World Cup kag ginpatukar ang mga themesongs sang nagliligad nga World Cup.
Nagset man sang rekord ang FIFA sa benta sini sa opening ceremony kun s adiin nagadangat sa 7.5 billion dollars nga isa ka billion nga mas mataas sang sa Russia sang 2018.
Antes ang opening game sang Ecuador kag Qatar, ginwelcome ni FIFA President Gianni Infantino ang tanan sa pagbukas sang FIFA World Cup 2022.
Suno diri, welcome ang tanan sa pagselebrar sang football bangud ang football ang naga-unite sa bug-os nga kalibutan.
Ginwelcome man sini ang tanan nga team kag nagtapos sa mga tinaga nga “let the show begin.”
