Nangin madinalag-on ang pagpatigayon kahapon sang pinakauna nga Bacolod Water Sports Festival sa ciudad sang Bacolod.
Ginpangunahan ni Bacolod Lone District Congressman Greg Gasataya ang opening ceremony sa Baywalk Recreational Park kag suno diri, iya ginakalipay nga natuman na ang handum sang ciudad nga magpatigayon sang Water Sports Festival.
Suno diri, pinaagi sa ini nga aktibidades, mapromote ang ciudad kag ma-inggnayo ang turista nga magpadulong sa Bacolod City.
Suno naman kay Bacolod City Councilor Jason Villarosa, ang committee chairman sang Committee on Tourism sa Sangguniang Panlungsod, nangin madinalag-on ang opening pa lamang sang Bacolod Water Sports Festival kag sa karun ginaplanohan na nga ini ang mangin yearly event sa ciudad.
Kahapon, nagpatigayon sang Jet Ski exhibition, Boat Tug of War, Kayaking, Bangkarera kag iban pa nga mga activities nga ginpartisiparan sang mga bisita naggikan sa Malaysia, Zamboanga kag Boracay.
Suno kay Villarosa, ang event patigayunon sa sulod sang duha ka bulan kag isa man sa plano amo nga ini ang patigayunon duha ka beses sa isa ka tuig, kadungan sang Summer kag Masskara Festival.
Samtang, nagpasalig naman sang seguridad ang Bacolod City Police Station 1 sa karun nga ginapatigayon nga Bacolod Water Sports Festival.
Sa interview sang Bombo Radyo kay Police Major Elmer Bonilla, station commander sang Bacolod Police Station 1, nag-augment ini sang masobra sa 25 ka mga police personnel nga magabantay sa area sang Baywalk Recreational Park.
Nagpasalig ini nga yara ang kapulisan kag emergency unit nga nagabantay inkaso nga may magluntad nga insidente.
