Apisar sa mga nangin pag-ulan sang aga kahapon, nadayun gid gihapon ang Masskara Festival Arena and Street Dance Competition (School category).
Ang programa ang pasado ala-1:00 na naka-umpisa bangod man sa dugang nga preparasyon agud maplastar ang gin-ulanan nga venue.
Si Mayor Greg Gasataya mismo ang naglawag sang mga participating schools gikan sa pito ka school district sa Bacolod City.
Ang mga nagpasakop ang ginlakipan sang Andres Bonifacio Elementary School, Estefania Elementary School, Asuncion Lizares Elementary School, Pagalaum Village Elementary School, Rizal Elementary School, Education and Training Center School 1 kag Rodolfo A. Medel Sr Elementary School.
Suno kay Mayor Greg 2019 ang ulihi nga pagpatigayon sang School category kag Brgy Estefania ang ulihi nga nangin champion.
Ginbalik gid sini ang school category bangod humalin paman sadto required na sa mga estudyente ang magsaot sa Physical Education nga subject.
Sa pagpasakop sa Arena and Street Dance Competition, estudyante man ukon manunudlo tanan sa buluthuan ang proud sa ila representasyon.
Suno sa alkalde, may-ara sang nagtawag sa iya nga naka-apresyar sang dedikasyon sang mga kabataan kag nagtanyag nga hatagan sang P150,000 ang tanan nga eskwelahan nga nagpartisipar.
Naghatag man sang mensahe sa pagsugod sang programa sa Department of Education – Negros Island Region Director Dr Ramir Uytico.
Suno diri, ini ang iya una nga bes nga makatambong sa Masskara Festival Arena and Street Dance Competition.
Ginpasalamatan sini ang City Government sa paghatag sang tyansa sa mga estudyante nga mashowcase man ang ila nga mga talento.
Nagalaom ini nga mangin simbolo sang City of Smile ang kapiestahan kag wala na sang maga-bash sa social media sa pagpadayun sa pagsaot sang mga kabataan apisar nga malain ang tiyempo.
Suno diri, ang eksperyensya ang balunon sang kabataan kag magaserbe nga bugal tubtob sa ila nga pagdako.
Ginpasalamatan man sini ang mga ginikanan kag manunudlo nga nagsuporta sa mga kabataan.
