Nagapadayon man ang operasyon sang mga kapulisan apisar sang ceasefire nga epektibo halin Disyembre 23, 2019 tubtob January 7, 2020.
Sa interview sang Bombo Radyo kay NOPPO Deputy Provincial Director for Administration Police Lieutenant Colonel Adrian Acollador, aminado ini nga madamo sang indi pabor sa ginpatuman nga ceasefire apang bangud direktiba ini sang presidente, ila ini pagatumanon.
Apang ginpaathag man ni Acollador nga yara sa full alert status ang kapulisan.
Suno sa iya, nagapadayon ang normal nga operasyon sang mga pulis, ang pagserbe sang warrant kag ang deployment ilabi na sa Simbang Gabi.
Gindugang niya man nga may mga police assistance desk sa simbahan kag may direktiba na sa mga nagkalain-lain nga istasyon nga mangin alerto sa tanan nga tion.
Nagpahanumdom man ini sa mga pumuluyo nga maghalong bangud apisar nga nagdeklarar ang CPP-NPA sang ceasefire, indi dapat magpakampante bangud indi sigurado kun nagasunod ang tanan nga mga rebelde sa ila nga lider.
Nagpangabay man ini sa mga rebelde nga kuntani magsungka na kag mag-ugyon sa gobyerno.
Suno sa iya, may yara sang P25 million nga ginpartinisar para sa livelihood program sang mga ini kun magbalik sila sa sabak sang gobyerno.
Gindugang niya man nga kuntani indi na sang mga ini pagdudahan ang sinseridad sang gobyerno.
