Amat-amat na nga nagabalik sa normal ang operasyon sang Corazon Locsin Montelibano Memorial Regional Hospital.
Madumduman nga temporaryo nga gin-untat sang pila ka departamento ang pagbaton sang mga pasyente bangud nagpositibo sa COVID 19 ang mga doktor, nurse kag iban nga staff.
Suno kay CLMMRH medical center chief Dr. Julius Drilon, nagabaton na ang regional hospital sang Obstetric kag Gynecology patients samtang naganormalise naman ang dalagan sang outpatient department (OPD).
Nagapadayun naman ang emergency department apang wala pa naga-operate ang pediatrics bangod anom pa ka doktor ang positibo sa virus.
Suno kay Drilon, 80 porsyento sang operasyon sang ospital ang nakabalik na, samtang tatlo ka porsyento naman sang kabug-usan nga populasyon sang empleyado diri ang nagpositibo sa virus.
Nagapati si Drilon nga magabalik na sa normal ang operasyon sang Corazon Locsin Montelibano Memorial Regional Hospital makaligad ang pila ka mga inadlaw.
Sa pagtsekyar sang Bombo Radyo kaina sang kaagahon, wala sang nagpila sa gwa sang CLMMRH.
