Nagapamatok ang mga grupo sang mga abogado sa ginahimo nga pagpalos sang Comelec sang mga campaign posters, tarpaulin kag billboard nga ginaalegar indi insakto ang kadakuon apisar nga yara ini sa pribado nga lugar.
Santo sa guidelines sang Comelec, 2×3 feet lamang dapat ang kadakuon sang campaign posters.
Ginapahanugutan naman ang 3×8 feet sa campaign meetings kag rallies.
Ginadumilian man ang campaign materials sa LED boards, LCD screens ukon monitors, mga salakyan nga ginapanag-iyahan sang gobyerno, pampubliko nga transportasyon kag pribado nga propedad nga wala sang pahanugot sa tag-iya.
Apang suno sa Comelec, indi sila pwede nga magsulod na lamang sa private property kag manghukas sang campaign materials kun wala sang pahanugot sang tag-iya.
Kinahanglan man nga may yara sang pormal nga abiso kag may 72 ka oras ukon tatlo ka adlaw ang tag-iya agud boluntaryo nga hukson ang illegal nga poster ukon streamer.
Sang Huwebes, trending ang hashtag nga #AnyareComelec.
Suno sa pila ka mga netizens, may mga tion nga wala nagakasunod ang mga guidelines sa idalum sang Comelec resolution.
Nagpahanumdum ang UP Law, Recoletos Law Center kag UP Clinical Legal Education Program nga kinamatarong sang maskin sin-o ang magpabutyag sang ila balatyagon sa politika ilabi na sa tion sang eleksyon.
