Magaupod ang mga operator kag driver sang mga jeep nga nagabyahe Mansilingan-Central Market vice versa sa kawsa sang Bacolod Alliance for Commuters Operators and Drivers (BACOD) nga mag-untat sang byahe sa Lunes agud magpatigayon sang protesta sa atubang sang Bacolod City Government Center.
Suno kay Richie Barito, sobra na 20 ka tuig nga nagabyahe, maupod sila nga mga driver sa untat byahe sa Lunes bangud para man ini sa ila.
Suno sa 46-anyos nga driver, sa pagbyahe sila nagasalig sang income sa pang-adlaw-adlaw nga kinahanglanon.
Naghingyo ini sang gamay nga pag-intindi sang mga commuters bangud magauntat sila sang byahe sa Lunes.
Suno diri, siya man mismo ang operator sang jeep apang nagagasto man ini sa maintenance sang jeep.
Isa sa mga ginaduso sang mga ini nga pahanugutan sila nga magbyahe ukon indi pagdulaon ang traditional jeepney dalan.
