Ginpanindugan sang general manager sa Weessam Express nga kinahanglan na nga patigayunon ang reclamation project sang Bacolod Real Estate and Development Corporation (BREDCO) para sa development sang port operations.
Sa interview sang Bombo Radyo Bacolod kay Frank Carbon, tuman na ka delayed ang reclamation project sang BREDCO, nga dapat napatigayon 10 tubtob 20 ka tuig na ang nakaligad.
Panugyan sini nga kun ano ang mareclaim, dapat ini ang idevelop bangod tuman na ka gamay ang Bacolod City para sa masobra 600 mil nga pumuluyo gani kinahanglan na ang expansion.
Apang paathag sini nga mas maayo kun sa reclamation project, may ara man kaupod nga master planning kag seguruhon nga sa pagdevelop sang duta yara na ang tanan nga amenities bangod mabudlay kun wala nagaangot ang dalan, tubig kag suga.
Pinaagi sini, mapadasig ang pag-uswag sang ciudad sang Bacolod, kun sa diin dapat man nga ihamtang sa idevelop nga reclaimed land ang mga commercial centers mga bodega kag mga highrise buildings agud nga indi na pugtak-pugtak ang serbisyo.
Indi kaangay sa Iloilo City kag Cebu City kun sa diin natingob lang sa sentro ang development, ang ciudad sang Bacolod ang nakafocus sa nagkalainlain nga mga lugar.
Sa pihak nga bahin, sa reclamation project, nalakip naman dapat ang plano sa pag-imprubar sang port operations.
Kalakip man sa goal development ang pagpatahom sang shoreline agud mas matahom sa mata sang mga foreign investors kag pagdula sang mga basura nga sa masami ginakaon sang mga sisi kag talaba kag nagaresulta pa sa red tide.
Samtang natalana naman nga magpatigayon sang public hearing ang Sangguniang Panlungsod alas-9:30 subong nga aga, agud patpaton ang request sang BREDCO nga mahatagan sang Resolution of No Objection (RONO) sa request nga dugang nga 25 hectares nga reclamation project.
