Plano sang mga operators sang ginpangtow nga mga modernized jeepneys nga pasakaan sang kaso nga carnapping si Bacolod Traffic Authority Office (BTAO) Head Patrick Leonard Lacson.
Ini kasunod sang pagtow ang BTAO sang walo ka mga modernized jeepney units sa dalan Araneta, tinalikdan nga inadlaw.
Sa interview sang Bombo Radyo Bacolod kay Jermin Adoptante, operator sang modernized jeepneys, ang obstruction ang ginhatag nga rasun sang BTAO sa pagpanakop.
Apang paathag sini nga nagabyahe ang walo ka modernized jeepney sang sila ang ginbanggaan kag ginpapanaog ang mga pasahero.
Panindugan sini nga bangod sa natabo, madamo sang mga driver kag konduktor ang apektado kag sila ang gina-ulan man sang reklamo kag pamangkot sang mga ginpapanaog nga pasahero.
Pahayag sini nga ginatanyag sang mga driver ang ila lesinsya apang nagsabat ang BTAO personnel nga indi nila ini kinahanglan sa baylo pilit sang mga ini nga ginkuha ang mga yabi.
Aminado man ini nga sila ang wala sang napakita nga Mayor’s Permit ilabi na nga nagdalagan pa ang kaso sa tunga nila sang management sang Choret Corporation.
Pahayag ni Adoptante nga kun may kaangay nga reklamo, kuntani nagpahibalo anay sa ila ang BTAO agud mapaathagan sa matuod nga sitwasyon.
Suno diri, sila ang nag-upod sa modernization program kun sa diin ginsurrender nila ang mga prangkisa sa korporasyon kag sila man ang nagbayad sang tanan nga gastos.
Apang wala nagakahulugan nga ginahatag na nila ang ila mga prangkisa kag ang Choret Corporation na lamang ang magapanag-iya sang mga modernized jeepney units.
