Temporaryo nga ginsiraduhan ang opisina sang Social Security System Bacolod Branch para sa disinfection matapos magpositibo sa coronavirus disease ang isa ka empleyado diri.
Sa interview sang Bombo Radyo kay SSS Bacolod Branch Head Ma. Shiela Galeno, ginpahayag sini nga sang Lunes nila nahibaluan nga nagpositibo ang isa ka empleyado sang ahensya nga masami nga naga-work from home bangud ini ang nagabusong kag nagakadto lang sa opisina kun may importante nga himuon.
Suno kay Galeno, gin-admit sa ospital ang nasambit nga empleyado bangud manugbata na ini kag nalakip sa protocol ang pagkuha sang swab kag nagwa nga positibo siya sa virus.
Kahapon sang hapon, ginsirad-an ang opisina agud makapatigayon sang disinfection tubtob subong nga adlaw.
Dako man ang kumpiyansa sini ng indi maglapta ang COVID infection sa opisina gani sa Huwebes, magabalik na ang ila operasyon.
Nagpasalig man ini nga ila hugot nga ginapatuman ang mga health protocols kaangay sang pagsuksok sang face mask, face shield kag pag-obserbar sang social distancing.
