Wasak nga keyboard sang computer kag nagalinapta nga ginkumos nga papel ang naabtan sang mga Barangay Tanod sang Barangay Bulad sa banwa sang Isabela, Negros Occidental sang Domingo sang gab-i sang nagsaka ang mga ini sa opisini sang Sangguniang Kabataan sang Barangay.
Sa interview sang Bombo Radyo Bombo Radyo Bacolod kay Philip Libradilla, SK Chairman sang Barangay Bulad, Isabela, Negros Occidental, bangud sa nakita sang mga Barangay Tanod, ginreport ini sa Barangay kag ginpahibalo siya.
Natingala man si Librilla sang ini nagpadulong sa opisina sang SK nga naguba na ang computer.
Wala man sang nadula nga importante nga mga papeles bangud ginsiguro man ni Libradilla kag ginadala niya man ini sa ila nga balay, magluwas nalang sa mouse sang computer kag iban nga papeles nga gingisi kag ginpangkumos.
Wala man nakahibalo si Libradilla kun sin-o ang nagsulod sa opisina sang SK kag nagpangguba sang computer kag nagpanggisi kasubong man nagpangkumos sang papel.
