Wala pa nabaton sang opisina sang Committee on Finance and Appropriations sa Sangguniang Panlungsod sang ciudad sang Bacolod ang opisyal nga dokumento para sa 2025 budget.
Sa interview sang Bombo Radyo Bacolod kay Councilor Jude Thadeus “Thaddy” Sayson, Chairperson sa Committee on Finance and Appropriations, sang tinalikdan nga bulan nagpadulong si Bacolod City Mayor Alfredo ‘Albee’ Benitez kaupod ang mga konsehal kag department heads sang ciudad sa Thailand para sa budget planning.
Suno diri, ang proposed budget nga nasturyahan amo ang P4.4 billion nga mas mataas sangsa P4 billion nga budget sang nakaligad nga tuig.
Apang, suno kay Sayson wala pa sang pinal nga desisyon para diri bangod nga may yara pa sang ginaprocess nga source of fund kaangay na lamang sang mga pumuluyo nga nagsaylo sa relocation sites nga mahimo na magbayad kun luyag na nila nga makuha ang titulo.
Suno pa diri, nag-umpisa na ang SP sa pagbayad sa mga loan sang nagakaligad nga administrasyon apang ang loan naman sa administrasyon subong ni Benitez ang indi pa mabayaran sang madali.
Dako naman nga budget ang makadto para sa basic services para sa mga pumuluyo kaangay na lamang nga ginpasakaan sang alkalde ang budget para sa ayuda sang senior citizens agud nga mas madamo sang mahatagan.
Pahayag ni Sayson, may patigayunon nga budget hearing sa Nobyembre samtang ang deadline naman sa pagpasar sang budget sa SP amo sa Disyemnbre.
Samtang, nagapati naman ini nga wala sang problema nga dako ang kwarta nga utangon sang ciudad basta ini ang gamiton sa insakto.
