Nagapati ang Deputy Secretary General sang PDP Laban sa Visayas nga ang tikang nga ginhimo sang kongreso ang isa ka political attack kay Vice President Sara Duterte.
Madumduman nga 215 ka mga house members ang nagpirma pabor sa pagimpeach sa bise presidente.
Sa interview sang Bombo Radyo Bacolod kay Atty. JV Hinlo, nagapati ini nga ang nagakatabo sa karun kaangay sang pagpaimpeach sa bise presidente ang may clearance nagikan sa presidente.
Ini bangud wala sang bisan isa nga magapati nga may natabo nga pagduso sang impeachment nga wala nakahibalo ang presidente sang pungsod.
Suno kay Hinlo, wala man sang ginpatigayon nga agresibo nga imbestigasyon sa iban nga departamento kag nahibaluan ang pinakadako nga benepisyaryo sang confidential fund ang presidente.
Gani dako ang pagpati sini nga ang ginhimo nga pagpaimpeach sa bise presidente ang political attack.
Suno diri, ang mga kongresista ang indi man maghimo sang ginpang-ubra kaangay sang pagboto agud maimpeach ang bise presidente nga wala sang clearance sang presidente.
Ginpahayag man ni Hinlo nga maathag man nga indi man magpasugot si House Speaker Martin Romualdez nga magpatigayon sang imbestigasyon ang mga upod sini sa kongreso kun wala man man pahanugot nagikan sa pakaisa sini nga presidente sang pungsod.
Nagapati man si Hinlo nga ang impeachment hearing ang maabtan pa sang bag-o nga magapungko nga senador sang pungsod.
Ginalantaw man nga wala anay ginpadayon ang impeachment hearing antes mag-adjourn ang senado bangud nagakinahanglan ang mga ini sang suporta ilabi na nga nagikan sa Iglesia ni Cristo nga una nagrally nga nagapanawagan nga indi pagpadayunon ang impeachment sang bise presidente.
Gani nagalaom ini nga madaog ang siyam ka sa solid PDP candidates sa Senado agud nga makakuha sang siyam nga suporta ang bise presidente kag indi na madayon ang impeachment.
