Maisog nga ginpanindugan sang opisyal sa Partidong Demokratiko Pilipino-Lakas ng Bayan (PDP-Laban) nga magapamatok ini sa nagatuhaw nga Duterte-Duterte tandem sa 2022 elections.
Sa interview sang Bombo Radyo Bacolod kay PDP-Laban vice president for Visayas Atty. Lutgardo Barbo, indi ini pabor kun magapadalagan si Davao City Mayor Sara Duterte bilang Presidente samtang ang amay naman sini nga si President Rodrigo Duterte ang kandidato para sa pagkabise presidente.
Suno diri indi ugyon ang PDP-Laban sa Political Dynasty nga makita sa mga Duterte kun sa diin opisyal man sa Davao City ang iya mga kabataan.
Panindugan man sini nga indi maayo ang record ni Presidente Duterte sa iya anom ka tuig nga pagpamuno sa pungsod bangod madamo sang nagkalamatay.
Nagapati si Atty. Barbo nga ginapatulan ni Duterte si Senator Manny Pacquiao bangod sa personal sini nga interes nga magpadalagan sa masunod nga eleksyon.
Bangod sini, wala naman nagakasunod ang prinsipyo sang partido kag may nagaluntad nga conflict sa tunga sang mga miyembro sang PDP-Laban.
Kalakip na diri ang ginpatigayon nga assembly ni Department of Energy Secretary Alfonso Cusi sa Cebu nga indi aprubado ni Pacquiao bilang interim president sang partido.
Sa karun, wala pa nakadesisyon ang ruling party kun si Pacquiao ukon kun sin-o paman nga opisyal ang padalaganun sa 2022 Presidential Election.
