Nagpatigayon sang pagsinapol ang mga opisyales sang tatlo ka probinsya nga ginalakipan sang Negros Occidental, Negros Oriental kag Siquijor sa pagpanguna ni Senate President Juan Miguel Zubiri angot sa hagna nga magatukod sang Negros Island Region (NIR).
Ang pagsinapol gintambongan sang Chairman sang Committee on Local Government Senator JV Ejercito, Special Assistant to the President Anton Lagdameo, Negros Occidental Governor Eugenio Jose Bong Lacson, kag Vice Governor Jeffrey Ferrer, Negros Oriental Governor Chaco Sagarbarria kag Vice Governor Jake Reyes kag Siquijor Governor Jake Villa nga nagtambong pamaagi sa Zoom.
Sa facebook page ni Senate President Juan Miguel Zubiri, iya ginpakigbahin ang pagkit-anay sang mga gobernador kag bise gobernador para sa pagdiskusyon sang NIR.
Tinutuyo sang NIR bill nga mapahapos ang pagpadangat sang serbisyo sang gobyerno sa idalum lamang sang isa ka rehiyon.
