Naaprubahan na sa first hearing ang ordinansa nga hatagan sang cash award ang mga nakapasa sa board exam, mga estudyante nga nadala sa top kag mga athletes sa ciudad sang Bacolod.
Sa interview sang Bombo Radyo kay Councilor Jason Villarosa, Chairperson sang Committee on Youth, SK Affairs and Sports Development, nakita sini ang effort sang mga kabataan ilabi na ang mga sports enthusiasts kag oustanding students nga nagtop sa board exam.
Suno diri, luyag sini nga mahatagan sang awarding ceremony kada Disyembre ang mga medalists sang palaro kag mga topnotchers.
Sa mga nagtop sa board, sila ang makabaton sang P50,000 bilang top 1, sa top 2 tubtob top 5 naman, sila makabaton sang P30,000 kag sa top 6 tubob top 10, sila ang makabaton sang P20,000.
Sa patag naman sang hinampang, ang nagpartsipar sa Philippine National Games , ang nakakuha sang gold medal makabaton sang P10,000, P7,000 sa silver medal kag P5,000 sa bronze medal.
Suno kay Villarosa, kun mahuman na ang Bacolod City Coliseum, didto na hiwaton ang awarding ceremony para sa sini nga tuig.
Sa bulan sang Disyembre, magakolekta naman ang ciudad gikan sa Professional Regulation Commission, Department of Education, Office of the Youth and Sports sang mga pangalan nga hatagan sang award.
Pahanumdom ni Villarosa, nalakip sa requirements para sa nakapasar sa board exam,amo nga dapat sila naka-enroll sa ciudad sang Bacolod sang sila nag-eskwela sang High School kag dapat nga registered voter sa ciudad ang mga ginikanan sang awardee.
