Ginaduso sa karon sa Sangguniang Panlungsod sang Bacolod ang ordinansa nga magamandu sa mga kalan-an nga magserbe sang libre kag safe nga drinking water sa mga kustomer.
Sa interview saang Bombo Radyo kay Bacolod City Councilor Kalaw Puentevella, chairman sang committee on health and sanitation sa Sangginiang Panlungsod, iya ginpropose ang ordinansa nga nagarequire sa mga restaurants nga maghatag sang libre nga tubig para imnon nga sa nakita sini, may yara sang mga establisyimento nga mabudlay pangayuan sang service water.
Luyag sini nga mahatagan sang insakto nga serbisyo kag malimpyo nga potable drinking water ang mga customers sang restaurents kag food outlets.
Suno kay Puentevella, may yara sang nagpadulong sa ila nga opisina nga nagpadangat sang reaksyon sini base sa naeksperyensya sa isa ka restaurant.
Gani, luyag sini nga makakuha sang suhestyon gikan sa mga nagapanag-iya sang restaurant kag food outlets agud nga mahatagan pa gid sang pagtulun-an ang oridnansa.
Magapatigayon man ang konsehal sang public hearing nga imbitado ang mga stakeholders kag sila man mahatagan sang tyansa nga makapahayag sang ila bahin angot sa ordinansa para sa kaayuhan sang tanan sa siyudad sang Bacolod.
