Pasado na sa first reading sang Bacolod City Council ang ginaduso nga ordinansa tuhoy sa paghatag sang special electrical permit sa mga illegal settlers agud makapatakod sang kuryente.
Sa interview sang Bombo Radyo Bacolod kay Councilor Thaddeus “Thaddy” Sayson, ang author sang ordinansa, simple lamang ini apang may dako nga epekto.
Paathag sini nga yara sa kasuguan nga antes makapatakod sang kuryente, kinahanglan anay sang land title.
Bangod wala sini ang mga illegal settlers, ini ang nagaresulta nga sila ang nagajumper ukon nagatap sang kuryente.
Pahayag ni Sayson nga ang illegal connection ang pinakamasami nga rasun sang sunog.
Paathag ni Sayson nga sa idalom sang ordinansa, mahatagan sang electrical permit ang mga illegal settlers agud lamang matakdan sang kaugalingon nga kontador kag indi na magjumper sa iban.
Apang wala man nagakahulugan nga indi na illegal settlers ang ila status.
Ini ang nakita lamang nila nga paagi agud mahatagan sang legal electric connection ang kada panimalay, nga pamaagi man agud mapanubo ang systems loss nga ginapapas-an sa tanan nga member consumers.
Magluwas sini, plano man ni Sayson sa amendment sang ordinansa nga ilakip naman ang koneksyon sang tubig.
