Nagadihon na ang committee on transportation sa Sangguniang Panlungsod sang Bacolod sang ordinansa nga magatukod sang Traffic Department nga yara sa Bacolod City Government Center, bulos sa Bacolod Traffic Authority Office.
Suno kay City Councilor Al Victor Espino, chairperson sang committee on transportation, wala pa nasakabat si Police Major Junji Liba, pinuno sang Bacolod Traffic Authority Office, angot sa panawagan sang Sangguniang Panlungsod nga matambong ini sa committee hearing agud nga maistoryahan ang traffic ordinances sang ciudad.
Suno kay Espino, mahimo nga wala pa nakalab-ot kay Liba ang resolusyon sang City Council.
Sang tinalikdan nga adlaw, nagkitaay ang mga ini sa Bacolod Traffic Authority Council meeting apang wala si Liba nakamuno angot sa resolusyon.
Sa State of the City Address naman ni Mayor Alfredo Benitez, ginmention sini ang pag-enhance sang opisina nga nagatutok sa trapiko kag dako ang posibilidad sang pagtukod sang Department of Traffic.
Sa personal nga paglantaw ni Espino, dapat nga empleyado sang city government ang pinuno sang Traffic Department agud nga maimpose sa iya ang mga dapat nga direksyon ukon patakaran sang city government bangud ang ciudad ang nagasweldo sa iya, indi pareho sa karon nga Philippine National Police ang nagasweldo sa BTAO head.
Suno sa konsehal, mahimo nga matapos na ang ordinansa angot sa pagtukod sang Traffic Department sa sulod sang tatlo ka bulan.
