Pasado na sa second kag third and final reading ang city ordinances nga nagamando sang mandatory wearing of facemask kag observance of social distancing subong man ang mandatory observance sang “non-special period” ukon curfew sa mga pampubliko nga lugar sa ciudad sang Bacolod.
Sa session nga ginpatigayon kahapon sang Sangguniang Panlungsod sang Bacolod, gin-aprubahan sang mga city officials ang amo nga mga ordinansa agud nga malikawan ang paglapta sang coronavirus disease 2019 (COVID-19).
Suno sa author nga si Councilor Archie Baribar, ang magalapas sa mandatory wearing of facemask kag observance of social distancing ang may penalidad nga P200 ukon community service kada offense.
Samtang, P500 pesos naman ukon community service kada offense ang mangin penalidad sa magabayolar sa curfew.
Nahibaluan nga ang curfew sa Bacolod ang nagasugod alas-10:00 sa gab-i tubtob alas-4:00 sa kaagahon.
Suno kay Baribar, dapat gid nga magsunod ang pumuluyo sa mga ordinansa sang ciudad bangud para man ini sa ikaayo sang tanan.
