Mahimo na nga ipatuman ang mga city ordinances nga nagamando sang mandatory wearing of facemask kag observance of social distancing subong man ang mandatory observance sang “non-special period” ukon curfew sa mga pampubliko nga lugar sa ciudad sang Bacolod matapos nga napublish na ini sa mga pamantalaan.
Sa interview sang Bombo Radyo Bacolod kay Vice Mayor El Cid Familiaran, chairman sang inter-agency task force against coronavirus sa ciudad, ginpahayag sini nga ginahanda pa sa karon ang official receipt kag citation tickets nga pagagamiton para sa mga violators.
Nahibaluan nga ang magalapas sa mandatory wearing of facemask kag observance of social distancing ang may penalidad nga P200 ukon walo ka oras nga community service sa kada offense.
Samtang, P500 pesos naman ukon walo ka oras nga community service kada offense ang mangin penalidad sa maga-bayolar sa curfew.
Suno sa bise alkalde, sarang magpatuman sang amo nga mga ordinansa ang mga pulis, traffic enforcers subong man ang mga barangay tanod.
Kun may madakpan ang mga barangay tanod, 20% sang multa ang magakadto sa barangay collections.
Nahibaluan nga kun madakpan, isyuhan ini sang OR kag magabayad gilayon.
Apang, kun wala naman sang kwarta ang violator, hatagan ini sang citation ticket kag sa City Treasurer’s Office na magabayad.
Ukon, mahimo man sila mag-community service sa sulod sang walo ka oras.
