Wala pa mahibaluan kun san-o liwat makabalik sa paghampang ang Orlando Magic forward nga si Paolo Banchero matapos nga makaangkon sang oblique injury.
Suno sa Magic, iga-evaluate liwat ang kondisyon sang 21-anyos nga basketball star sa sulod sang apat tubtob anum ka semana.
Nakuha sini ang injury sa fourth quarter sang hampang sang Orlando batok sa Chicago Bulls kun sa diin nalutos ang Magic, 102-99.
Si Banchero ang nagapanguna sa ila team sa scoring nga 29 points per game kag assists matapos ang nauna nga lima ka games subong nga season.
Sa pag-umpisa sang hampang sa pagbukas sang regular season, may 116-97 win ang Magic batok sa Miami Heat kun sa diin may 33 points kag 11 rebounds si Banchero.
May career-high 50 points man ini sa 119-115 win sang Magic batok sa Indiana Pacers nga amo ang naghimo sa iya nga second-youngest player sa NBA history nga naka-50 points, 10 rebounds and five assists sa isa lamang ka hampang sunod kay LeBron James sang 2005.
