BACOLOD CITY – May yara sang isa ka marching order para sa magapungko nga bag-o nga pinuno sang Provincial Environment and Natural Resources Office sang Negros Occidental.
Ini ang pahayag ni Director Al Orolfo sang DENR Negros Island Region, pila ka adlaw antes ang pagpungko ni Edgardo Rostata bilang PENRO head, bulos kay Andres Untal.
Suno kay Orolfo, si Rostata ang ginamanduan nga hatagan sang solusyon ang isyu sa Northern Negros Natural Park kun sa diin dapat nga tapuson na sini ang pagdihon sang general management plan ukon GMP.
Ang GMP suno kay Orolfo ang magaserbe nga blueprint ukon sulundan sa pag-uyat sang protected area.
Ang GMP ang aprubahan sang Protected Area Management Board antes ipadala sa central office sang DENR agud nga aprubahan sang tiglikom sang ahensya.
Sa karun, status quo ang mga structures nga ginpatindog sa natural park nga natunga sa duha ka zona.
Suno kay Orolfo, indi gid mahimo nga makabutang sang structure sa restricted zone samtang magadepende naman sa management plan kun ano ang pahanugutan nga mga structure sa multiple use zone.
