Ginalantaw karon nga problema sang Bacolod City Police Office (BCPO) kun sin-o ang otorisado nga supplier sang barrier sa motorsiklo kadungan sa pagpatuman sang amo nga polisa sa mag-asawa nga naga-angkasanay subong nga may yara sang coronavirus pandemic.
Sa interview sang Bombo Radyo Bacolod kay BCPO spokesperson P/Lt.Col. Ariel Pico, ginpahayag sini nga nabudlayan karon ang mga motorista bangud nga wala pa sila may nahatag nga direktiba kun sa diin mahimo makabakal sang barrier.
Suno kay Pico, madamo karon sang nagaligya sang barrier ilabi na sa online apang indi masiguro kun ano ini ka safe gamiton.
Dugang pa sang tagpamaba nga dapat mangin vigilante ang mga motorista sa pagbakal sang barrier.
Nagalaom si Pico nga masolusyunan subong nga semana kun sa diin sarang makabakal sang barrier bangud naluoy na gid ini sa mga nagakadakpan.
Suno sa iya, mas pabor siya nga mag-angkasanay nalang ang mag-asawa sa motorsiklo sangsa magsakay sa jeep bangud nga indi masiguro kun sin-o ang carrier sang virus sa pampubliko nga mga salakyan.
Apang dapat nga magsunod man sa mando nga magbutang sang barrier.
Nahibaluan nga may multa nga P500 para sa first offense, P1,000 sa second offense, P1,500 sa third offense kag kanselasyon sang lisensya.
