BACOLOD CITY — Nagahimo na sang supplemental immunization ang mga local government units nga apektado sang measles ukon tipdas sa probinsya sang Negros Oriental kasunod sang deklarasyon sang outbreak sang balatian.
Sa interview sang Bombo Radyo Bacolod, ginpahayag ni Dr. Socrates Villamor, provincial chief sang Department of Health Negros Oriental, nga ini ang tikang sang mga ciudad kag banwa nga may yara sang kaso sang tipdas.
Ginamonitor man nanday Villamor ang pito ka iban pa nga LGUs bilang kabahin sang contract tracing agud mahibaluan ang source sang measles.
Sa idalom sang supplemental immunization suno kay Villamor, ginapangita ang mga lapsag nga nagaedad pa lamang sang pila ka bulan nga wala pa nabakunahan agud hatagan sang measles-containing vaccine.
Pagahatagan man sang bakuna ang mga kabataan nga nagaedad sang lima ka tuig panubo nga wala pa nahatagan sang ikaduha nga dose sang bakuna.
Kadungan sini, gin-athag ni Villamor nga 11 lang ang kumpirmado nga positibo sa tipdas.
Ini ang ginalakipan sang napulo ka adults kag isa ka lapsag nga nagaedad sang apat ka bulan.
Hugot naman nga nagamonitor ang Provincial Health Office sang Negros Occidental sa mga local government units nga malapit sa Negros Oriental kasunod sang outbreak sang measles ukon tipdas.
Sa interview sang Bombo Radyo, ginpahayag ni Provincial Health Officer Dr. Ernell Tumimbang nga wala sang kaso sang tipdas sa Negros Occidental apang ila nga ginamonitor ang sitwasyon sa boundary sang Oriental kaangay sang ciudad sang Kabankalan.
Pagalantawon man ang coverage sang bakuna sa mga barangay nga malapit sa Negros Oriental bangud sa posibilidad nga magatabok ang masakit.
Ginamonitor man ang mga ospital para sa posible nga pasyente nga may rashes.
Kun kinahanglanon suno kay Tumimbang, magapatigayon sila sang catch-up immunization.
Suno sa doktor, nakahanda ang Department of Health Region 6 para diri.
