Ginakabig gihapon sang Philippine National Police (PNP) kag Commission on Election (COMELEC) nga malinong ang labing-una nga parliamentary election sa Bangsamoro Autonomous Region sa Muslim Mindanao, para sa ila overall assessment.
Ini apisar sang pila ka mga reports nahanungod sa insidente sang mga pagpangluthang ukon strafing sa bug-os nga rehiyon.
Ginpahayag ni PNP spokesperson Allen Rae Co, nga ang mga nagluntad nga pagpaniro ang gina-categorize nga isolated cases lamang.
Naka-record man ang PNP sang tatlo ka indibidwal nga ginbawian sang kabuhi tuga sang pagpangluthang.
Sa bahin naman sang COMELEC, ginabutyag ni Chairman George Garcia ang iya kasubo sa nasambit nga pagpangluthang sa Cotabato City.
Hugot sini nga ginkondenar ang amo nga insidente.
Madumduman nga pila ka mga manunudlo ang nag-atras kag wala na nagpadayon para mangin election officers.
Nagluntad man ang baylohanay sang lupok sa tunga sang PNP Special Action Force kag mga wala pa natumod nga armado nga grupo sa Shariff Saydona Mustapha sa Maguindanao del Sur.
