Ginbakbak na sang Bacolod City Engineer’s Office ang overflow nga ginalantaw isa sa mga rasun sa pagsaka sang baha sa Barangay Sum-ag, Bacolod City.
Madumduman nga nagdangat sa hawak ang pagbaha sa Purok Fatima 2, Barangay Sum-ag matapos ang madamol nga mga pag-ulan dala sang Bagyo Kristine tinalikdan nga inadlaw.
Ginabasol naman sang madamo ang overflow sang isa ka pribado nga propidad nga amo ang nagabara sa pag-ilig sang tubig kag nagtuga agud magsaka sa dalan ang baha.
Sa interview sang Bombo Radyo Bacolod kay Punong Barangay Rodney Carmona, ginsuguran na sang City Engineer’s ang pagbakbak sang overflow kag nagalaom ini nga pinaagi sa tikang malikawan na ang mga pagbaha kadungan sang madamol nga mga ulan.
Sa karun, nagalibot naman ang rescuers kag emergency reponders sang Barangay sa mga suba kag flood prone areas kag nagareport sa iya opisina kada duha ka oras.
Panugyan naman sini sa mga pumuluyo nga magakinahanglan sang rescue nga indi magduhaduha sa pagcontact sa Bureau of Fire Protection agud sila ang makuha kag madala sa mas hilway nga lugar.
