Nagreklamo ang isa ka pasahero bangud sa overloading sang mga pasahero sang Modernized Jeep nga nagabyahe sa routa sang Alijis sang Enero 27.
Sa Ipa-Bombo Ta Segment sang Bombo Radyo Bacolod, ginpahayag ni Nida Gallunon Orduyo nga halin siya sa Panaad Park and Stadium sa opening sang Provincial Meet 2026 sang Lunes, kag sila ang nagab-ihan na sakay sa amo nga jeep upod sang iya nga apo nga nagperform man sa nasambit nga event.
WATCH: https://www.facebook.com/share/v/1KGqRQG4D6/
Suno kay Orduyo, apisar nga nagaginutok na ang sulod sang jeep, padayon sa gihapon ang konduktor sa pagkuha kag pagpasakay sang pasahero.
Dugang pa sini nga wala man naghatag sang discount sa senior citizen kag estudyante ang konduktor, kag sila ang ginsukot sang P20 kada isa.
Suno diri, ang mga estudyante nga sakay sang amo nga jeep ang nagasinggit na bangud sila ang naipit kag nagabinunggo-anay.
Sang ginsaway sini ang konduktor, ginsabat siya nga magnaog nalang agud mabuslan sang iban.
Panawagan ni Orduyo sa Land Transportation Office (LTO) sa Bacolod City nga hatagan sang pagtamod ang kaangay nga insidente agud nga madisiplana ang mga konduktor kag ang mga driver sa modernized jeep.
