Posible nga suspendihon ang overseas voting kag ideklarar sang Comelec ang failure of election sa Afghanistan kag Ukraine.
Sa isa ka hearing sa Kamara, ginpahayag ni Comelec Director Sonia Bea Wee-Lozada nga mabudlayan nga makaboto ang mga registered overseas voters sa nasambit nga mga pungsod bangud sa nagapadayon nga repatriation didto.
Suno kay Wee-Lozada, ang duha ka pungsod ang may pending reports nagikan sa DFA nga kinahanglan man nga ideklarar ang posible nga suspension ukon failure of elections ilabi na sa Afghanistan bangud sa mandatory repatriation.
Suno sa data sang Comelec, may 1,697,090 registered Filipino voters overseas, lakip na ang 27 sa Afghanistan kag 15 sa Ukraine.
Temporaryo man nga ginsuspendi sang Comelec ang overseas voting sa Shanghai, China bangud sa nagakatabo nga lockdown tuga sang pagsaka sang kaso sang COVID-19.
Suspendido man ang overseas voting sa Algeria, Chad, Tunisia, Libya, kag Iraq bangud sa security concerns.
Gintuldukan naman sang Comelec ang panawagan nga i-extend ang overseas voting bangud wala ini ginapahanugutan sang Konstitusyon.
